കഥ....... വിവാഹ സമ്മാനം.

     വിവാഹ ജീവിതത്തിന്റെ ആദ്യ നാളുകളിൽ ആയിരുന്നു അയാൾ. തികച്ചും അപ്രതീക്ഷിതമായിട്ടായിരുന്നു വളരെ ദൂരെയുള്ള പഴയ സുഹൃത്തിന്റെ വീട് തേടിപ്പിടിച്ചുള്ള വരവ്. പ്രാഥമിക ക്ഷേമാന്വേഷണങ്ങൾ പരസ്പരം നടത്തിക്കഴിഞ്ഞ ശേഷം അപ്പോൾ അവിടെ ചെല്ലാനുള്ള കാരണവും പറഞ്ഞു.

' രേണുക ഒരു സമ്മാനം ഏല്പിച്ചിരുന്നു. അത് തരാനും കൂടിയാണ് ഞാൻ വന്നത് '

 കേട്ടപാടെ അയാളുടെ മുഖം മ്ളാനമായെങ്കിലും അത് മറച്ചു പിടിച്ച് ഒരു കുറ്റബോധം അലട്ടും പോലെ അയാൾ പറഞ്ഞു.

' തിരക്കിനിടയിൽ രേണുകയേയും ക്ഷണിക്കാൻ മറന്നു.'

' സാരമില്ല ' . ആഗതൻ സമാധാനിപ്പിക്കും മട്ടിൽ പറഞ്ഞു.

' അതിന്റെ പേരിൽ ഇനിയുമൊരു പരിഭവം അവൾ പറയില്ല.'

ആഗതൻ സമ്മാനപ്പൊതി നീട്ടി. 

      പായ്ക്കറ്റിൽ നിന്നും പിച്ചളയിൽ നിർമ്മിച്ച സ്ത്രീ രൂപം എടുത്തു പൊക്കി അയാൾ ആഹ്ളാദത്തോടെ പറഞ്ഞു.

' വളരെ നന്നായിരിക്കുന്നു. എനിക്ക് ഇത് വളരെ ഇഷ്ടപ്പെട്ടെന്ന് രേണുകയോടു പറയണം.'

ആഗതൻ മിണ്ടിയില്ല.

' ഒരു പ്രത്യേക സാഹചര്യത്തിൽ അവളെ വേദനിപ്പിക്കേണ്ടി വന്നെങ്കിലും അവൾ എന്റെ മനസ്സിൽ എന്നും ഉണ്ടാകും.'

' ഇനി അതൊക്കെ പറഞ്ഞിട്ട് എന്തു കാര്യം.' 

ആഗതൻ അതിൽ താല്പര്യമില്ലാതെ മറ്റൊന്നു പറഞ്ഞു.

' പിച്ചളയ്ക്ക് ഒരു പ്രത്യേകതയുണ്ട്. നല്ലവണ്ണം തേച്ചു മിനുക്കിയാൽ അത് സ്വർണ്ണം പോലെ തിളങ്ങും. ഇല്ലെങ്കിൽ തിരിച്ചറിയാൻ കഴിയാത്ത വിധം കറുത്തു പോവുകയും ചെയ്യും.'

' ഞാൻ ഇത് സ്വർണ്ണമായി എന്നും സൂക്ഷിക്കും.'

' നല്ലത്.'

     ആഗതൻ യാത്ര പറഞ്ഞ് എഴുന്നേറ്റു. ഒരു നിമിഷം ആ ശില്പത്തിലേക്കു തന്നെ നോക്കി നിന്നു. പിന്നെ ഉള്ളിൽ പറഞ്ഞു. നിന്നെ ഈ കശ്മലന് പരിചയപ്പെടുത്തിയത് ഞാനാണ്. അതിനുള്ള ശിക്ഷയും ഞാൻ വഹിച്ചു കഴിഞ്ഞു. നിന്റെ ആത്മഹത്യാ കുറിപ്പിലെ ആവശ്യം പോലെ നിന്റെ ഭൗതികാവശിഷ്ടം അടക്കം ചെയ്ത ശില്പം ഞാൻ തന്നെ നിന്നെ ചതിച്ചവന് കൊടുത്തു കഴിഞ്ഞിരിക്കുന്നു. ഇനി എനിക്കു മാപ്പു തരണം...!
               -------------------------
       താന്നിപ്പാടം ശശി.
----------------------