മിനിക്കഥ.... ജലകന്യക

     പാലത്തിൽ കയറി അയാൾ പുഴ കാണുകയായിരുന്നു. അപ്പോഴാണ് വിയർപ്പിൽ കുളിച്ച്, ഓടിക്കിതച്ചൊരു യുവതി എത്തിയത്.
അവളുടെ കണ്ണിലെ മഷി ആ മുഖത്തു പടർന്നിരുന്നു. അതോ ആ കണ്ണുകൾതന്നെ കലങ്ങിയിരുന്നുവോ!
   '  എന്നെ ഒന്നുസഹായിക്കുമോ '
വാക്കുകൾ പുറത്തു ചാടാൻ വൈകിയെങ്കിലും അയാളുടെ അതിനെന്താ എന്ന  ഭാവം പുറത്തു ചാടിയിരുന്നു.
കൈയിലെയും കഴുത്തിലെയും ആഭരണങ്ങൾ ഊരി,അതിനോടൊപ്പം ഒരു കുറിപ്പും നീട്ടിയിട്ടു പറഞ്ഞു.
' ഈ അഡ്രെസ്സിൽ ഇതൊക്കെയൊന്നു വീട്ടിലെത്തിക്കണം. വായ്പവാങ്ങിയതാണ് '
അപ്പോൾ നിങ്ങൾ എങ്ങോട്ടു പോകുന്നുവെന്നു അയാൾക്കു ചോദിക്കേണ്ടി വന്നില്ല. അവൾ ഒരു പൈശാചിക ചിരിയോടെ പറഞ്ഞു.
' ഞാനൊരു ജലകന്യകയാണ്. എനിക്ക് തിരിച്ചപോകാൻ നേരമായിരിക്കുന്നു.'
കണ്ണടച്ചു തുറക്കുമ്പോഴേക്കും അവൾ പുഴയിലേക്കു ചാടിക്കഴിഞ്ഞിരുന്നു.
               ------------------------
         താന്നിപ്പാടം ശശി
-------------------------