കാഴ്ചപ്പാട്

     സ്മൃതിയുടെ മൂക്കിനു താഴെ പൊടിഞ്ഞ വിയര്‍പ്പില്‍ നനഞ്ഞ രോമരാജിയില്‍ തോണ്ടി ഫ്രെഡ്ഡി ചോദിച്ചു.

'നിനക്ക് ഇന്നു തന്നെ പോണോന്നുണ്ടോ '

പാര്‍ക്കിലെ ആളൊഴിഞ്ഞ കോണിലെ ചെമ്പകച്ചോട്ടില്‍ ,സ്മൃതിയുടെ മടിയില്‍ തലവച്ചു കിടക്കുകയായിരുന്നു അയാള്‍.

അവളുടെ കണ്ണുകര്‍ അപ്പോള്‍ വട്ടത്തിലാവുകയും വല്ലാതെ കൂര്‍ത്തു പോവുകയും ചെയ്തു.എപ്പോഴുമെന്ന പോലെ അപ്പോഴും അയാളുടെ കണ്ണുകള്‍ തന്നെ തോല്‍വി സമ്മതിച്ചു പിന്‍വാങ്ങി.

     ഒാഫീസ്സില്‍ കയറാതെ രണ്ടുപേരും രാവിലെ  മുതല്‍ ചുറ്റിയടിക്കുകയായിരുന്നു.

'അപ്പോ ഞാമ്പറഞ്ഞതൊന്നും നെനക്ക് മനസ്സിലായില്ലേ '   സ്മൃതി ചോദിച്ചു.അയാള്‍ അപ്പോള്‍  അവളുടെ രോമരാജി നനഞ്ഞ് അമര്‍ന്നുണ്ടായ രേഖയ്ക്കു താഴെ വീണ്ടും മുത്തമിടാനാണ് തോന്നിയത്.

'അറിയില്ലേ. ഇനി രണ്ടു നാളേയുള്ളൂ.ജോലിത്തിരക്കാണെന്ന് ഇനിയും പറഞ്ഞാല്‍ വീട്ടുകാര് കൊല്ലും '

     പിറകിലേക്ക് ചാഞ്ഞ് കൈയൂന്നി ഇരുന്നിരുന്ന അവള്‍ കുലുങ്ങിച്ചിരിച്ചപ്പോള്‍ കഴുത്തോളം എത്തിവലിഞ്ഞ ചുരിദാര്‍ ഷോളിനു കീഴെ നിലയ്ക്കാത്ത ഇളക്കമുണ്ടായി.

     അതിനു കീഴെ ഒരിക്കല്‍ കൂടി മുഖം ചേര്‍ത്തു വയ്ക്കാന്‍ അയാള്‍ കൊതിച്ചു.

'അതിരിയ്ക്കട്ടെ.നീ നെന്റെ ചേട്ടായിയുടെ കല്യാണത്തിനു പോണില്ലേ '

പെട്ടെന്നു ഒാര്‍ത്ത  പോലെയാണ് സ്മൃതി ചോദിച്ചത് എങ്കിലും അവള്‍ ഉള്ളില്‍ ചിരിക്കുകയായിരുന്നു.

     അതു കേട്ടപാടെ അയാളുടെ മുഖം മങ്ങി.അയാള്‍ പരിഭവിച്ചു.

'ന്നാലും നിനക്ക് ഈ കല്യാണത്തിന് സമ്മതം തോന്നിയല്ലോ '

     അയാളെ അവള്‍ ചേര്‍ത്തു പിടിച്ചു.അയാളുടെ ബാലിശമായ പ്രവൃത്തികള്‍ അതിന്റെ പ്രായശ്ചിത്തമെന്ന മട്ടില്‍ അനുവദിക്കുകയും ചെയ്തു.

'എന്റെ കണ്ണില് നീയൊരു ത്രില്ല് കാണണില്ലേ ഫ്രെഡ്ഡി 'അവള്‍ ചോദിച്ചു.

     അയാള്‍ അപ്പോഴും  പരിഭവത്തിിന്റെ ചുഴിയിലായിരുന്നു.അയാള്‍ കണ്ണുകള്‍ അടച്ചതേയുള്ളൂ.

'ഭര്‍ത്താവും കാമുകനും ഒരു വീട്ടില്‍ നിന്നാകുന്നതിന്റെ ത്രില്ലിലാ ഞാന്‍ '

     അയാളുടെ കണ്ണുകള്‍ പെട്ടെന്നു തുറന്നു.കേട്ടതില്‍ വിശ്വാസം വരാതെ അയാള്‍ അവളെ തുറിച്ചു നോക്കി.

'

എന്താ നെനക്ക് നെന്റെ ചേട്ടത്തീടെ കാമുകനാകാന്‍ കകഴിയില്ലേ '
അപ്പോള്‍ വിടര്‍ന്നു പോയ അയളുടെ ചുണ്ടിലും കണ്ണിലും തെരുതെരെ ഉമ്മവച്ചു കൊണ്ട് അവള്‍ ചോദ്യം ആവര്‍ത്തിക്കുകയും ചെയ്തു.
'നെനക്കു നെന്റെ ചേട്ടത്തീടെ കാമുകനാകാന്‍ കഴിയില്ലേ '
                           -----------------
                 താന്നിപ്പാടം ശശി.
          -----------------------